Skal intervjue leiarkandidatar

23. september gjekk fristen ut for å søke på jobben som dagleg leiar i Blått kompetansesenter vest. Dei neste vekene skal åtte personar stille på jobbintervju.

– Me er ganske fornøgd med talet på søkjarar og no ser me fram til å bli betre kjent med kandidatane, seier styreleiar Vivian Bjånesø Horgen.

– Målet vårt er at Blått kompetansesenter vest skal vere eit nav i den havbaserte Vestlands-klynga. Då treng me ein engasjert og kompetent leiar, seier styreleiar Vivian Bjånesø Horgen.

Etter fleire år med planlegging blei Blått kompetansesenter vest stifta som eit føretak sommaren 2019. Sidan den gong har styret – beståande av Vivian Bjånesø Horgen, Geir Lasse Taranger, Hege Lauvik og Morten Storebø – førebudd etableringa av klyngeorganisasjonen.

– Sjølv om den blå klynga i Austevoll er velkjent og veletablert, så er jobben vår likevel prega av nybrottsarbeid, seier styreleiaren.

– Det er første gong me endeleg skal samle kreftene og ressursane i Austevoll og Vestland i ein eigen organisasjon. Her skal me sameine næringsliv, forsking og utdanning endå meir. Målsettinga er å fylle hòla som me ser mellom private aktørar, offentlege institusjonar, og verkemiddelapparatet som Innovasjon Norge.

Blått kompetansesenter vest har tilsynelatande eit stort potensial for å lukkast. Etableringa er eit samarbeid mellom Vestland fylkeskommune, det statlege Havforskingsinstituttet, næringsforeininga i Austevoll, og Austevoll kommune. Ifølge styreleiar er det avgjerande no å få på plass dagleg leiar.

– Målet vårt er at Blått kompetansesenter vest skal vere eit nav i den havbaserte Vestlands-klynga, som bidreg til å gjere det lettare å drive næringsutvikling, rekruttering, utdanning og næringsretta forsking. Då treng me ein engasjert og kompetent leiar.